防曬產品基本知多點

夏日炎炎大家一定有支防曬傍身，包裝上面常見嘅標示有UVA、UVB、SPF、PA同Broad Spectrum究竟有咩含意呢? 同大家再重溫一下!

UVA

光波較長，穿透力強，可穿過雲層、表皮層及真皮層細胞，令細胞出現變化，引致皮膚老化，產生皺紋，係慢性同長久嘅影響。

UVB

光波較短，穿透力比UVA弱，但足以令皮膚變紅、曬黑甚至曬傷。

SPF

Sun Protection Factor嘅簡稱, 係一個針對防護UVB嘅系值。SPF系值愈高，對UVB的防護當然愈全面。不過根據美國食品及藥物管理局早係2011年公佈嘅最新管理規定，當SPF系值大過50，暫時未有足夠資料同數據支持佢嘅相對功效，所以只建議標籤係SPF 50+。至於SPF系值大過50，係咪愈高愈有效，暫時未有定論。現時嘅效能測試一般都係以SPF 50為準。

PA及Broad Spectrum

至於針對UVA嘅防護，唔同國家都有唔同嘅指標。

例如日本採用PA值(Protection Grade of UVA)，PA後嘅加號愈多，保護時效就愈長。根據日本化妝品工業連合會嘅指引，現行最高嘅PA值係PA++++(4個加號)

而美國就用Broad Spectrum 字樣標示。

如果防曬產品上同時寫有SPF值同埋Broad Spectrum標示，代表呢個產品可以同時防護UVA同UVB，即係除咗可以防曬傷，亦可以減少引致皮膚癌嘅機會兼延緩皮膚老化。

但如果防曬產品無Broad Spectrum標示或者SPF值只有2-14，咁一般只能夠針對UVB作出防護。

最後再提提大家搽防曬最基本要注意嘅地方

選擇同時對UVA同UVB有防護功效嘅防曬產品

盡量選擇防曬指數較高嘅產品

每兩小時塗抹一次

成人防曬產品應避免使用係6個月以下嘅嬰兒身體上，因為嬰兒皮膚較敏感及脆弱。